Derisa vazhdojnë bisedimet për formimin e qeverisë, në opinion thellohen ndasitë rreth orientimit strategjik të Maqedonisë. Madje rryma të caktuara gjithnjë e më zëshëm kërkojnë që Maqedonia të aderojë drejt Rusisë. Edhe në mediat sociale janë formuar grupe që i bëjnë thirrje presidentit rus Vlladimir Putin që ta përfshijë edhe Maqedoninë në Federatën Rusë. Për ish diplomatin Risto Nikovski edhe pse këto thirrje mund të cilësohen vetëm si shprehje të folklorit, dhe nuk kanë të bëjnë me realitetin, në të mirë të Maqedonisë do të ishte që Rusia të rritë ndikimin në Ballkan.
"Kjo gjithashtu është sinjal i asaj se si Maqedonia trajtohet nga Brukseli dhe Uashingtoni, po përjeton pragun e fundit të tolerancës...Do ishte mirë nëse Rusia do të luante rol më të madh në Ballkan me qëllim që të ketë balancë politik, pasi konstalacioni i tanishëm i marrëdhënieve pas rënies së Jugosllavisë, që kur SHBA-të u bënë forcë dominuese në Ballkan ato sillen paksa në mënyrë të papërgjegjshme. Çdo monopol shkakton një gjë të tillë prandaj do ishte mirë që Rusia të jetë më e pranishme në Ballkan", deklaroi Risto Nikovski, ish diplomat.
Nga ana tjetër për Bojan Mariçiq nga Qendra maqedonase për edukim evropian, thirrjet e tilla për bashkim drejt Rusisë janë të rrezikshme për të ardhmen evropiane të vendit, megjithëse janë si rezultat i trumbetimit të politikave anti-evropiane të pushtetit.
"Kjo është si rezultat i propagandës intensive anti-evropiane që ndodh 5-6 vitet e fundit nga mediat pro-qeveritare, por edhe nga pakënaqësia e qytetarëve nga problemi i emrit dhe ngecja e integrimeve..tendenca tjetër është që të ushqehet vetëdija autokrate apo autoritare e qytetarëve, edhe studimet tona tregojnë se për pjesën më të madhe të qytetarëve rreth 70 % më me rëndësi është që të kenë lider të fuqishëm se sa shkallë më të lartë të demokracisë.. dekorata për Viktor Orban, miqësitë publike me Putinin, Erdoganin dhe biznesmenë indian dëshmojnë se çfarë modelesh promovohen si të suksesshme në Maqedoni", tha Bojan Mariçiq, Qendra Maqedonase për Edukim Evropian.
Sipas Mariçiq propaganda anti evropaine e vazhdueshme e qeverisë ka ndikuar që të ulet numri i qytetarëve që mbështesin orientimin euro-atlantik të vendit nga 75% në vitin 2007, në 50% aktualisht. Semra Jakupi
