ITALI - Ish-kryeministri italian Silvio Berluskoni nisi sot punën në shërbim të komunitetit në një shtëpi të moshuarish në Milano. Vitin e kaluar ai u dënua me 4 vite burg për evzion fiskal, por dënimi u kthye në shërbim 1 vjeçar për komunitetin për shkak të moshës së tij. Berluskoni do të punojë 4 orë në javë në azil, duke ndihmuar të moshuarit me sklerozë.
Mediat italiane bënë të ditur se ish-kryeministri ka studiuar sëmundjen e Alzheimer-it për t'u përgatitur për punën e tij në shërbim të komunitetit.
Përfaqësues të shtëpisë për të moshuarit thanë se 77-vjeçari do të jetë i shoqëruar gjatë gjithë kohës nga një specialist në fushën e Alzheimer-it, dhe se do të trajtohet si gjithë asistentët e tjerë.
Silvio Berluskoni u shpall fajtor për blerjen e disa të drejtave televizive nga firma e tij Mediaset në vitet 90'. Vitin e kaluar ish-kryeministri italian u shpall gjithashtu fajtor se ka paguar për seks me një prostitutë minorene dhe abuzim me detyrën. Ai u përjashtua nga senati dhe iu ndalua mbajtja e një posti publik.
