TIRANE- Problemi i pazgjidhur i pronësisë dhe borxhet në sektorin energjetik janë "mina me sahat" për ekonominë shqiptare. Këtë e ka pohuar dje, përpara studentëve të Fakultetit Ekonomik, shefi i Fondit Monetar Ndërkombëtar për Shqipërinë, Nadeem Ilahi.
"Unë do të rendisja dy kërcënime serioze për qeverinë. E para është çështja ende e pazgjidhur e pronave, të cilës qeveria duhet t'i japë një drejtim. Dhe së dyti, kriza në energjetikë. Për të dy këto çështje, kostoja e buxhetit është shumë e lartë dhe ato janë kthyer në një kërcenim serioz për stabilitetin ekonomik".
Këtë deklaratë shefi i FMN-së e bëri gjatë prezantimit të marrëveshjes së qeverisë me Fondin Monetar Ndërkombëtar me studentët. Vendimet e njëpasnjëshme të Gjykatës së Strasburgut për të drejtat e pronësisë po i marrin frymën buxhetit, pasi kostot që qeveria duhet të paguajë arrijnë në dhjetëra miliona euro, ndaj Fondi Monetar Ndërkombëtar i sugjeron qeverisë që t'i japë një zgjidhje këtij fenomeni, pasi edhe detyrimet nga Strasburgu do të vijnë duke u rritur.
Duke ju përgjigjur interesit të medias, Ilahi u ndal edhe tek çështja më e nxehtë e ekonomisë: borxhi publik. Sipas tij, FMN është në negociata me qeverinë për të gjetur një zgjidhje me vendosjen e një kufiri për këtë tregues. Sipas Ilahit, e rëndësishme është që të ketë një disiplinim fiskal, me qëllim që dhe borxhi të mos rritet pa kufi. Ndërsa mbetet në vëmendjen e FMN monitorimi në mënyrë të vazhdueshme i pagesave të prapambetura, që qeveria ka ndaj biznesit. Ajo çka nuk toleron FMN është krijimi i borxheve të reja ndaj biznesit, ndaj, sipas shefit të FMN, një nga kushtet e marrëveshjes është edhe frenimi i krijimit të detyrimeve të reja.
Shefi i misionit të FMN-së, Nadim Ilahi deklaroi se kriza në Shqipëri u thellua nga përkeqësimi i klimës së biznesit dhe dështimit me reformat në ekonomi.
"Historia tjetër që duhet treguar per Shqipërinë mendoj se është ajo se ku ndodhet klima e biznesit. Dhe më interesante është të shihet se çfarë ka ndodhur me të. Ka patur përkeqësim në renditjen e Shqipërisë në këtë tregues. Ne tre vitet e fundit, Shqiperia ka humbur 5 hapa. Dhe ky është një indikator që tregon se në çfare kahu po shkojnë politikat ose, më saktë, ku po shkonin deri vitin e kaluar", u shpreh Ilahi.
Sipas tij, rritja ekonomike u dëmtua edhe nga çekuilibrimi i financave publike dhe rritja e borxhit, përfshirë atë të prapambetur që shteti krijoi ndaj privatëve. Sipas tij, marrëveshja e Shqipërisë me FMN do të stabilizojë ekonominë.
"Marreveshja është për rigjallërimin e rritjes ekonomike dhe reformat që po bëhen janë për të ringritur ekonomine. Kjo pikë është nënvlerësuar paksa në publik, por unë mendoj se është kyçe dhe duhet theksuar", u shpreh Ilahi.
