Çështja e dygjuhësisë në mbishkrimet në urat dhe sheshet e Shkupit ka ngecur këto dy muaj për shkak të procesit zgjedhor në vend. Kështu deklaroi Rami Qerimi, njëri nga anëtarët e Komisionit për zgjidhjen e kontestit të përdorimit të gjuhës shqipe. Sipas tij, Komisioni i formuar dy muaj e ku bëjnë pjesë Naser Zyberi, Mihajllo Manevski, Vllado Popovski dhe dy përfaqësues të administratës së qytetit të Shkupit ka realizuar vetëm një takim formal para zgjedhjeve dhe është vendosur që mbledhja e ardhshme të mbahet pas formimit të qeverisë. E gjithë kjo sipas Qerimit, me qëllim që kësaj çështje të mos i jepet konotacion politik.
"Ky komision ka mbajtur vetëm një mbledhje pak para zgjedhjeve dhe për shkak të fushatës zgjedhore dhe zgjedhjeve e kemi lënë që takimin e radhës ta kemi menjëherë pasi të formohet qeveria...në atë takim për shkak se ishim në fushatë zgjedhore u morëm vesh që të mos i japim konotacion politik këtij mendimin që mund ta jep ky komision, ta lëmë këtë çështje ta diskutojmë menjëherë pas zgjedhjeve menjëherë pas formimit të qeveris", tha Rami Qerimi, anëtar i Komisionit.
Qerimi pret që mendimi i Komisionit do të jetë pozitiv dhe në favor të palës shqiptare se gjuha shqipe duhet të përdoret në gjithë territorin e Shkupit e jo vetëm në ato komuna të Shkupit ku përfaqësimi i shqiptarëve është mbi 20%. Mendimi i dhënë nga Komisioni sipas tij do të obligoj institucionet që të zbatojnë gjuhën shqipe edhe në praktikë, në të kundërtën do të duhet interpretim të ligjit nga ana e parlamentit.
"Duke analizuar ligjin për qytetin e Shkupit dhe ligjin për përdorimin e gjuhëve këtu nuk ka asgjë kontestuese, është shumë e qartë. Për ne përdorimi i gjuhës shqipe në qytetin e Shkupit është në tërë territorin e Shkupit andaj ashtu edhe duhet të zbatohet. Këtu ka një lëshim apo një keqkuptim nga pala tjetër, ata thirren në ligjin për emërtimin e rrugëve dhe urave në territoret ku janë 20% të komunave shqiptare në kuadër të qytetit të Shkupit mund të përdoret e atje ku nuk ka 20% nuk mundet të përdoret. Ne mendojmë se ai është interpretim i gabueshëm i ligjit kështu që shpresoj se me argumentet tona komisioni do të jep mendim, se ne nuk jemi komision që mund të vendos, do të jep mendim pozitiv për atë se gjuha shqipe duhet të përdoret në të gjithë territorin e Shkupit", u shpreh Rami Qerimi, anëtar i Komisionit.
Interpretimet ndryshe të ligjeve kanë anashkaluar zbatimin e gjuhës shqipe në qytetin e Shkupit. Ligji i gjuhëve thotë se në Qytetin e Shkupit, përveç maqedonishtes, gjuhë zyrtare është edhe ajo që flet 20% e popullatës, ndërsa ligji për emërtimin e objekteve, thotë se rrugët dhe objektet emërtohen edhe në gjuhë tjetër, kur 20 % e popullatës së komunës, i përket një etnie dhe gjuhe tjetër. Dallimi ka të bëjë me interpretimin në nivel të qytetit dhe të komunave. Gjyltene Rexhallari
