Shefat e shteteve dhe qeverive të 7 vendeve kryesore perëndimore industriale u mblodhën sot në Bruksel. Në takimin dy ditor, tema kryesore është Ukraina. Aty pritet të diskutohet edhe për qëndrimin ndaj Rusisë. Debati ka për qëllim të sigurojë edhe forma mbështetjeje për Ukrainën, e cila është në prag të falimentimit, sikurse edhe për presidentin e sapo-zgjedhur, Petro Poroshenko. Në rend dite të 7 ekonomive kryesore është vendosur edhe çështja e programit bërthamor iranian si dhe lufta në Siri. Diplomatët evropianë thonë se takimi do të dërgojë një sinjal të ri për krerët politik të Moskës, nga e cila do të kërkohet njohja e presidentit të ri të Ukrainës dhe fillimi i negociatave të drejtpërdrejta me Ukrainën. Qarqet qeveritare gjermane informuan se në takim nuk do të merret vendim lidhur me kushtet që i duhet të përmbushë tashmë Rusia, për t'u rikthyer në kuadër të G-8, por përkundrazi, në tavolinë mbetet ende mundësia e ashpërsimit të sanksioneve të BE-së dhe G-7 kundër Moskës. Ky është samiti i parë i G-7, organizuar nga BE-ja. Shefat e shteteve dhe qeverive e përjashtuan presidentin rus Putin nga ky grup, si pasojë e krizës në Krime. Petar Bllazhevski
