BRAZIL - Ndërsa duhet më pak se një javë nga fillimi i Kupës së Botës në Brazil, në qytetet kryesore të vendit vazhdojnë ende protestat nga artistët e graffitit të cilët prej javësh kanë përdorur punimet e tyre artistike për të tërhequr vëmendjen e gjithë botës dhe për të mobilizuar popullsinë e Brazilit.
Ata shprehen se janë të revoltuar që Kupa e Botës po zhvillohet në Brazil dhe shuma të mëdha parash nga buxheti i shtetit po përdoren për shpenzime të kota në vend që të përdoren në shërbim të zhvillimit të vendit i cili ka probleme të mëdha në shumë sfera të tjera. Nëpërmjet vizatimeve në rrugët e Rio de Janeiros ata po përshkruajnë korrupsionin, varfërinë dhe krimin në vend bashkë me faktin se qeveria nuk po bën asgjë për të ndryshuar gjëndjen aktuale.
Një prej graffistëve më të njohur, Roma, i njohur kryesisht për këndvështrimin politik të vizatimeve të tij ku përshkruan akte dhune të qeverisë dhe të FIFA-s si dhe vë theksin tek rreziku që paraqet një shoqëri pasive. "Vizatimet e mia janë realizuar me qëllim për të krijuar impakt në popullsi dhe për të komunikuar rëndësinë e asaj çka po ndodh. Janë zhpenzuar mbi 30 bilionë dollarë deri më tani ndërkohë që ne kemi shkolla dhe spitale që kanë nevojë për investime, ashtu si dhe shërbimet publike e një sërë problemesh të tjera për të cilat askush nuk di asgjë" është shprehur artisti Roma.
Që prej shkurtit të këtij viti graffitet janë dekriminalizuar nga kryetari i bashkisë së kryeqytetit dhe në shumë vende të botës mbrohen si shprehje e artit kulturor, por megjithatë një pjesë e vizatimeve të tyre janë fshirë nga autoritetet duke vënë në pikëpyetje politikat e censurimit që bien ndesh me të drejtat demokratike të popullit brazilian.
Gjithashtu dhe një tjetër graffist i quajtur Rodolfo, shprehet se vizatimet janë mënyra e tij për të protestuar paqësisht pa vandalizma, prishje ndërtesash apo djegje automjetesh. Ndaj ata kërkojnë që të paktën të lihen të përcjellin mesazhin e tyre tek pjesa tjetër e njerëzve.
Protesta të tjera priten të ndodhin gjatë zhvillimit të Kupës së Botës, për të cilat autoritetet po marrin masa të rrepta sigurie në 12 qytetet mikpritëse të Brazilit. Urdhërat zyrtarë komunikojnë për forcat e sigurisë së vendit se do të respektohen protestat e të gjithë qytetarëve brazilianë, por nuk do të ketë asnjë tolerancë për vandalizmat dhe dhunën.
