Biznesmenët shqiptarë së shpejti do të munden t'i lexojnë lajmet mbi sigurinë e ushqimit, edhe në gjuhën shqipe. Pas kronikës në Alsat M, kur vizituam Agjencinë për Ushqim dhe Veterinari e cila nuk i përmbahej detyrimit për ueb-faqe edhe në shqip, megjithëse për një gjë të tillë ishte firmosur memorandum edhe me Odën Ekonomike të Maqedonisë Veri-Perëndimore, sot kreu i Agjencisë Dejan Runtevski paralajmëroi ndryshim. Ai pranoi se materialet janë në përkthim e sipër, dhe shumë shpejt, ueb-faqja do të lançohet edhe në shqip.
"Në rrjedhë është përkthimi i faqes së internetit dhe të gjitha materialeve që do të postohen në seksionin në gjuhën shqipe. Pasi të zgjidhet kjo, do të fillojë të funksionojë edhe ueb faqja", tha Dejan Runtevski - Drejtor i Agjencisë për Ushqim dhe veterinari.
Edhe nga Oda Ekonomike e Maqedonisë Veri-Perëndimore konfirmuan se ka nisur procesi i përkthimit të ueb-faqes dhe materialeve të saj. Nga OEMVP-ja kanë angazhuar edhe një person të tyren, për përgatitjen e faqes e cila do të përshtatet sipas nevojave dhe kërkesave të komunitetit të biznesit. Dhjetë ditë më parë, nga kjo Odë thanë se nuk ishin kontaktuar asnjëherë për ndihmë nga Agjencia për Ushqim dhe Veterinari, për përkthimin edhe në shqip të materialeve për biznesmenët shqiptarë. Verica Pavlloski
