TIRANË - Një padi e rrallë ka mbërritur deri në dyert e Gjykatës së Lartë dhe kërkon të vë para përgjegjësisë tetë kryeministra të cilët kanë udhëhequr Shqipërinë në periudhën postkomuniste. Është mirditori qe jeton ne Durrës Nikoll Prenga i cili ka kallëzuar krerët e qeverive shqiptare pas viteve 1990, përfshi edhe kryeministrin aktual Edi Rama. Për këtë qytetar, përgjegjësit kryesorë për situatën e vështirë në të cilën është gjendur Shqipëria në këto vite janë ish-kryeministrat Sali Berisha, Fatos Nano, Aleksandër Meksi, Bashkim Fino, Pandeli majko, Ilir Meta, Ylli Bufi dhe udhëheqësi aktual i qeverisë Rama.
Kallëzimi është bërë në vitin 2014 në Prokurorinë e Përgjithshme organ i cili ka kompetencat për hetimin e zyrtarëve të lartë. Por padia i kaloi më tej Prokurorisë së Durrësit e cila më 23 korrik të 2014-ës i pushoi hetimet për moskompetencë të tyre. Me një vendim të qershorit 2015 të Gjykatës së Lartë, Prokuroria e Përgjithshme është e ?detyruar? të nisë hetimet për kallëzimin e qytetarit kundër tetë kryeministrave. Kjo gjykatë ka dërguar sërish në Prokurorinë e Përgjithshme padinë e Nikoll Prengës.
Në këto kushte, pritet që organi i akuzës të nisë hetimet ndaj krerëve të qeverive shqiptare nga 1990-2015 për mënyrën se si ata kanë qeverisur vendin, që për qytetarin Prenga janë përgjegjësit e situatës së vështirë që ka kaluar Shqipëria në periudhën postkomuniste.
