Skandalet e guvernatorit të Bankës së Shqipërisë nuk kanë të reshtur, sipas një denoncimi të radhës të bërë nga deputeti socialist Erjon Braçe tregohet lista e njerëzve të afërt me pushtetin të cilët janë të punësuar pranë bankës qendrore. Njëkohësisht në këtë listë të gjatë figurojnë si pjesëtarë të personelit edhe të afërm të vetë guvernatorit. Kështu mbesa e guvernatorit Fullani punon në Agjencinë e Sigurimit të Depozitave kurse nipi i tij rezulton i punësuar në Departamentin e Burimeve Njerëzore. Nga ana tjetër edhe mbesa e bashkëshortes së guvernatorit ndodhet pranë departamentit të informatikës të bankës qendrore. Më tej në listën e publikuar nga Braçe shihen të punësuar të tjerë njerëz të afërm me politikanët. Një nga emërimet më të fundit është edhe ai i vajzës së kryetares së Kuvendit Jozefina Topalli në departamentin e kërkimeve, ndërkohë që vajza e ministrit të financave Ridvan Bode punon në departamentin e stabilitetit financiar. Në departamentin e politikës monetare është i punësuar djali i kryetarit të komisionit parlamentar të politikës së jashtme, Fatos Beja, ndërsa në sektorin e kontabilitetit ndodhet djali i ish-kryetarit të lartë të kontrollit të shtetit, republikanit Robert Çeku. Por edhe kryeministri i vendit Berisha ka të punësuar në zyrat e bankës në nivelin e këshilltares kunatën e tij, ndërkohë që pushtetarë të tjerë kanë pranë bankës qendrore persona familjarë. Kështu, zv/ministri i Ekonomisë Enno Bozdo dhe zv/ministri i Transporteve, Ylli Manjani, kanë të punësuara motrat, ndërsa zv/ministri i Financave, Alfred Rushaj, ka të punësuar kunatën. Punonjës në Bankën e Shqipërisë rezultojnë të jenë edhe të afërm të kryetarit të Bashkisë, Lulzim Basha, prefektit të Tiranës, Keltis Kruja dhe ish kreut të ALUIZNI-t Shaban Memia. Po ashtu në këtë staf gjenden edhe të afërm të ish funksionarëve të lartë të së majtës. Ylli Bufi ka të punësuar vajzën, Xhoana Nano vëllanë, ndërkohë që rezulton të punojë pranë bankës edhe një nga mbesat e Ramiz Alisë. Sipas deputetit Braçe e gjithë kjo listë e gjatë njerëzish të futur në punë shpjegon fare mirë se si guvernatori ka kapur politikën dhe ka siguruar mandatin e tij. Puna në Bankën e Shqipërisë siguron disa lloj benefitesh të cilat nuk janë në poste të tjera të administratës shtetërore, ku përveç rrogave të larta, punonjësit përfitojnë edhe kredi me norma interesi 0.5%, në një kohë që të pastrehët si kategori në nevojë marrjen e një kredie për shtëpi e paguajnë me interes 3%.
