Në përmbyllje të vizitës së parë 4 ditore në Shqipëri, në kuadër të monitorimit të procesit elektoral të 23 qershorit, kreu i delegacionit të Institutit Demokratik Amerikan Howard Dean, thotë në një intervistë ekskluzive për vizion plus se tensioni parazgjedhor cënon standartin elektoral. "Në çdo vend ky lloj diskursi kaq i acaruar ka një ndikim në besimin e qytetarëve tek procesi zgjedhor. Të gjithë e dinë se trysnia shtohet sa më shumë me afrimin e ditës së votimit. Duhet të mos harrojmë që në fund të fundit, ata duhet të qeverisin vendin sepse fituesi një do të jetë. Ne inkurajojmë politikën shqiptare që të mendojë jo vetëm për fitimin e zgjedhjeve, por edhe sesi do të qeverisin vendin pasi ti fitojnë zgjedhjet". Ai nuk pranoi të komentonte mbi bisedën që pati me kryeministrin Berisha dhe deklaratën e këtij të fundit, se i kishte shprehur delegacionit shqetësimin se lideri i opozitës Edi Rama nuk do të njohë rezultatin nëse humb zgjedhjet. Por përfaqësuesi i NDI apeloi për një sjellje korrekte të forcave politike. "Në përgjithësi, nuk dua të flas për ato që diskutojmë në takime private. Por të gjithë politikanët që takuam në Tiranë, thanë se do ti fitojnë ata zgjedhjet dhe jo pala tjetër. Unë besoj se ka patur progres ccdo herë që ka patur zgjedhje në këto 20 vitet e fundit. Tani që kemi një ligj të mirë zgjedhor, u kërkojmë gjithë partive politike të bëjnë të pamundurën që të organizojnë zgjedhje korrekte". Guvernatori Dean, ish-kandidat për president në SHBA dhe ish-kryetar i Komitetit Kombëtar të Demokratëve, ka një përvojë të gjatë në fushatat elektorale. Raporti me firmen e guvernatorit Dean, për ecurinë e procesit elektoral në Shqipëri, pritet të marrë një rëndësi të veçantë pasi është referenca kryesore për krijimin e opinionit në Uashingtonin zyrtar.
