http://www.vizionplus.tv
https://facebook.com/VizionPlusTV
https://twitter.com/VizionPlusTV
Holanda vendos veton, duke bllokuar dhënien e statusit kandidat për Shqipërinë. Sipas portalit prestigjioz europian, "Euractiv", Parlamenti Holandez ka votuar kundër propozimit të qeverisë për t'i dhënë statusin Shqipërisë. Votimi, që sipas medias, është kryer të enjten ne mbrëmje, e detyron qeverinë e kryeministrit Mark Rutte, që të refuzojë propozimin e Komisionit Europian, që Shqipërisë t'i jepet statusi kandidat. Një veto e Holandës në Këshillin Europian, përkthehet në dështimin e katërt radhazi për vendin tonë për arritjen e kësaj faze të rëndësishme në fushën e integrimit në Bashkimin Europian."Euractiv" citon një zëdhënës të Parlamentit të Holandës, sipas të cilit, partia e kryeministrit liberal, Mark Rutte votoi kundër ndezjes dritës jeshile për Shqipërinë. Liderët e Bashkimit Europian duhet të votojnë të gjithë pro, që Shqipëria të përfitojë statusin e kandidatit. Holanda ka qenë historikisht një shtet skeptik sa i përket zgjerimit dhe këtë e ka treguar edhe në pengesat që i ka ngritur vazhdimisht Serbisë. Në këtë mënyrë, Holanda kthehet në të vetmen pengesë dhe vendimtare, në rrugën e Shqipërisë drejt BE-së. Më herët, Parlamenti Europian dhe Komiteti për Politikë të Jashtme në PE, kishin miratuar një rezolutë që kërkon që Shqipërisë t'i jepet statusi kandidat. Ndërsa komisioneri për Zgjerimin, Shtefan Fyle, që prej 16 tetorit kur rekomandoi dhënien e statusit, ka vijuar lobimin në BE.
