http://www.vizionplus.tv
https://facebook.com/VizionPlusTV
https://twitter.com/VizionPlusTV
Këto janë pamje që ndeshen shpesh në disa prej rrugëve kryesore të qytetit të Durrësit, ku mosfunksionimi prej vitesh i pjesës më të madhe të semaforëve shkakton përditë kaos në trafik dhe lëvizjen e qytetarëve. Ndaj, nëse iu bie rruga nga zona e plazhit apo do të jeni vizitorë në Durrës, duhet të merrni parasysh se semaforët edhe pse janë të vendosur nuk janë në punë dhe është mirë të bëni shumë kujdes, që të mos përfshiheni në ndonjë aksident. Në Durrës e dinë prej vitesh se cilat janë rrugët më problematike, por për ata që janë kalimtarë në këtë qytet duhet ta dinë se kryqëzimi tek Mauzoleumi i Dëshmorëve, sheshi "Pranvera", Pallati i Sportit etj, janë disa nga akset më problematikë ku përparësi duhet të kenë sigurisht këmbësorët. Kjo situatë në fakt është problematike edhe për drejtuesit e mjeteve, të cilët shprehen se semaforët duhet të rregullohen dhe secili të respektojë radhën. Për të mbajtur nën kontroll trafikun e mjeteve në qytet dhe sidomos në kryqëzime, policia rrugore ka shtuar efektivët e saj në rrugë, një masë kjo që stabilizon trafikun por dëmton rëndë imazhin e këtij qyteti turistik. Burime nga bashkia e Durrësit kanë bërë të ditur se këtë vit do të vihen në punë të gjithë semaforët e prishur, pasi ndërmarrja e rrugëve ka kërkuar një fond të posaçëm për këtë qëllim. Aktualisht vetëm dy semaforë janë në gjendje pune në gjithë qytetin e Durrësit, semafori tek stacioni i Trenit dhe ai në hyrje të Durrësit.
