TIRANE - Duke u tërhequr nga akuzat për Byronë e Hetimit dhe duke shprehur dakordësi për ngritjen e këtij institucioni të ri sipas versionit amerikan, lideri i opozitës Lulzim Basha i bëri ftesë publike kryeministrit Edi Rama për tu ulur në një tryezë e për të arritur konsensusin për reformën në drejtësi dhe pastrimin e sistemit nga të korruptuarit.
Fjala e Lulzim Bashës
Lufta kundër korrupsionit qeveritar, të zyrtarëve publik, kërkon të gjithë instrumentet, dhe ne i jemi mirënjohës partnerëve ndërkombëtarë, sic është Byroja e hetimit pas vërejtjeve nga Gjykata Kushtetuese. Prej më shumë se 4 muajsh pengesa për reformën në drejtësi e ka emrin Edi Rama, njeri i investuar politikisht dhe personalisht kundër konsensusit si vlerë, dhe si i vetmi mekanizëm për të ndërtuar një reformë të qendrueshme. Dikur kur e thonim këtë edhe na paragjykonin, por sot Komisioni i Venecias e thotë këtë, ata insistojnë tek konsensusi, tek marrëveshja jo si pazar por si një vlerë politike, të një reforme që bëhet për qytetarët jo për politikanët. Ja kam ofruar dhe vazhdoj t'ia ofroj. Opozita ofron bashkëpunimin dhe kryeministri e refuzon duke luajtur bllofin me 64 vota që të gjithë e dimë që nuk mund të kalojnë reformën në drejtësi, por që mund të shërbejnë për të djegur reformën. Reforma në drejtësi duhet të kryhet dhe PD është e gatshme të bëjë gjithcka.
Ekspertët e Komisionit të Venecias duhet ta kenë zhgënjyer sërish kryeministrin kur thanë se nuk është cështje numerike 2/3 3/5 por është cështje vlere, parimi, përfshirje substanciale e opozitës, pjesëmarrje konsensuale në reformën në drejtësi, e cila duhet dhe do të bëhet vetëm me konsensus. Nuk ka konsensus, madje nuk ka përpjekje as për konsensus as për dialog.
PD ra dakord me draftin e propozuar nga ekspertët për Byronë e Hetimi. Kemi tre muaj që kemi dhënë dakordësi, dhe ky zotëri që cirret për domosdoshmërinë e reformës në drejtësi, pse nuk e jep dakordësinë e tij. Kush e ka kapur për xhakete, kush ja mban dorën? Forcë e madhe duhet të jetë.
Pata e kapjes së drejtësisë nuk do ja bërë vezën e artë Edi Ramës. Duhet të dalë të flasë vetë si kryeministër, të thotë nëse e do reformën në drejtësi. Atij i leverdis drejtësia si alibi, dosjet që i mban dhe i nxjerr sipas qejfit. Nëse nuk është kështu, i përsëris ftesën, të ulemi dhe të punojmë me konsesus për një drejtësi të pastruar nga korrupsioni por të pakapur politikisht.
