Një konflikt për motive banale përfundoi me dy persona të plagosur mesditën e të premtes në Shëngjin, ndërsa policia nisi hetimet për ngjarjen. Incidenti ndodhi në afërsi të vendit të quajtur Lapidari në Shëngjin, në orën 14:30. Sipas burimeve nga Policia e Lezhës, mësohet se shkak për këtë konflikt është bërë mospagesa e tarifës mujore për mirëmbajtjen e shkallës dhe ashensorit nga ana e Gertian Malshit, i cili është edhe autori i plagosjes së shtetases Mimoza Aliaj 49 vjeçe.
Sipas policisë, bashkëshorti i 49-vjeçares, Gëzim Aliaj ishte përgjegjës shkalle në pallatin ku kishte banesë Malshi. Sherri kishte pasi përgjegjësi i pallatit, Gëzim Aliaj kishte shkuar në banesën e Gertian malashit për të kërkuar pagesën e përmuajshme. Pasi kanë debatuar për cilësinë e mirmbajtjes së shkallës dhe mospagesën e tarifës, Gertian Malshi ka qëlluar me çifte mbi bashkëshortët.
Saçmat kanë kapur 49 vjeçaren Mimoza Aliaj. Në këtë moment Gëzim Aliaj i ka rrëmbyer armën nga dora Malshit dhe e ka qëlluar, duke e lënë të plagosur. Ngjarja është neutralizuar vetëm pas ndërhyrjes së policisë, duke bllokuar një armë gjahu çifte si dhe duke shoqëruar personat e përfshirë në ngjarje.
Policia tha se dy të plagosurit, Mimoza Aliaj dhe Gertian Malshi, janë shoqëruar prej tyre në spitalin rajonal të Lezhës, ku edhe po marrin mjekimin dhe janë jashtë rrezikut për jetën. Sa i përket motiveve të ngjarjes, policia dyshon se ajo ka ndodhur për shkaqe banale.
