?Dorëzohet? kreu i institucionit kryesor të sekreteve në Shqipëri, i dekoruar pak ditë më parë, në fshehtësi, nga Presidenti i Republikës, Bujar Nishani. Pas një rezistence të gjatë, Visho Ajazi Lika ka pranuar, më në fund, që Shërbimi Informativ Shtetëror t?i nënshtrohet një kontrolli financiar nga Kontrolli i Lartë i Shtetit, për periudhën 1 janar 2014 deri në 31 dhjetor të vitit 2015. Shqiptarja.com mëson se një grup audituesish të institucionit më të lartë të kontrollit financiar në Shqipëri kanë zbarkuar në mjediset e Shërbimit Informativ Shtetëror që në datën 10 qershor të 2016, për verifikimin e ligjshmërisë së zbatimit të buxhetit. Auditimi financiar i SHISH do të përfundojë në datën 10 gusht. Grupi i kontrollit i përbërë nga Aulona Jonuzi, Eni Kabashi dhe F. Zija, do të monitorohen nga Manjola Naço, drejtoreshë e Departamentit të Auditimit të Pushtetit Qendror, Administratës së Lartë Publike, Menaxhimit Financiar dhe Auditimit të Brendshëm në KLSH.
Audituesit, para kontrollit të SHISH, janë pajisur me certifikatën e sigurisë nga Drejtoria e Sigurimit të Informacionit të Klasifikuar pranë Kryeministrisë. Në 25 gusht, grupi i audituesve pritet të hartojë raportin përfundimtar për kontrollin e Shërbimit Informativ Shtetëror. Raporti, me shkelje ose problematikat e konstatuara, do t?i dorëzohet Komisionit për Sigurinë Kombëtare. Për shkak se veprimtaria financiare e SHISH, sipas ligjit, përbën sekret shtetëror, inspektorët e Kontrollit të Lartë të Shtetit, do të raportojë gjetjet e auditimin në Komisionin e Sigurisë, në një seancë me dyer të mbyllura.
