Misioni i ndihmës Policore të Bashkimit Europian, për Policinë e Shtetit, PAMECA 4, ka kritikuar organin e prokurorisë, për hetimet e së paku 5 dosjeve të rëndësishme gjatë këtij viti. Kritikat janë adresuar në hetimin e pajisjes IMSI Catcher dhe kreun e Policisë, Haki Çako, si dhe dosjes së Emiliano Shullazit, Arben Frrokut (i akuzuar për vrasjen e komisar Dritan Lamajt) si dhe kryetarit të bashkisë së Kavajës, Elvis Roshi.
Dosja IMSI Catcher dhe Çako
Sipas një raporti të hartuar nga PAMECA, janë vënë re shkelje në hetimet e dosjes për IMSI Catcher. Për këtë hetim gjykata pezulloi kreun e Policisë së Shtetit Haki Çako, dhe dy vartësve të tij në Drejtorinë e Forcave Operacionale. Në raport theksohet se hetimet ishin bazuar thjesht mbi dyshime dhe që rrezikuan për një periudhë kohe vijueshmërinë e punës në Polici. Po ashtu nuk kishte asnjë të dhënë se pajisja IMSI Catcher, ishte në gjendje të kryente përgjime.
