Pak orë përpara nisjes së sesionit parlamentar opozita ka mbledhur firmat për ndryshimin e kushtetutës dhe ligjit për zgjedhjen e Kryeprokurorit të Përkohshëm. Vendimi u mor pas mbledhjes së grupit demokrat ku u kërkuara që Prokurori i Përgjithshëm të kthehet në ligjshmëri.
Në iniciativën ligjore që do të depozitohet në kuvend opozita kërkon që Deri në zgjedhjen e Prokurorit të Përgjithshëm sipas procedurës së parashikuar në nenin 148/a të Kushtetutës, funksionet e Prokurorit të Përgjithshëm do të ushtrohen nga një prokuror i caktuar nga Kuvendi, me tre të pestat e anëtarëve të tij, mes kandidaturave të propozuara nga Gjykata Kushtetuese, për një mandat të përkohshëm.
Sipas amendamentit ?nëse Kuvendi nuk arrin shumicën e caktuar për zgjedhjen brenda 10 ditëve nga propozimi, kandidati i renditur i pari, që ka kaluar me sukses procesin e rivlerësimit kalimtar sipas ligjit, konsiderohet i emëruar".
Kandidatët sipas opozitës duhet t?i nënshtrohen procesit të rivlerësimit me procedurë të përshpejtuar dhe me përparësi ndaj të gjithë subjekteve të tjera të rivlerësimit.
Kërkesa për kthimin e ligjshmërisë sipas opozitës është e lidhur me anulimin e procedurës që u ndoq nga kuvendi për zgjedhjen e kryrprokurores së Përkohshme, Arta Marku.
Demokratët argumentojnë se amendamentet kushtetuese dhe ligjorë të propozuar janë sipas standardeve të Komisionit të Venecias, ku kërkohet që zgjedhja e Prokurorit të Përgjithshëm, të bëhet nëpërmjet një procedure që garanton përfshirjen në proces të një strukture të pavarur të përbërë nga ekspertë të së drejtës, për vlerësimin e kandidatëve.
