Nën masa të rrepta sigurie, Gjykata e Shkodrës caktoi masën e sigurisë ?arrest me burg? për Ardjel Lulajn dhe Endri Çopjen, dy të akuzuarit e dyshuar të atentatit me ekskploziv ndaj Lulzim Kullës me 13 janar në Shkodër.
E njëjta masë sigurie u vendos edhe për Serxho Tetën, i akuzuar për moskallëzim të krimit. Përpara Gjykatës të tre personat nga Elbasani, mohuan të kenë lidhje me ngjarjen e 13 janarit, ku mbetën të plagosur 8 persona.
Të tre të arrestuarit pretenduan se nuk kanë qenë në Shkodër ditën e atentatit, por se kanë qenë herë të tjera për të negociuar me grupe në Shkodër që merreshin me shitblerjen e kanabisit, por pa specifikuar të dhëna të tjera.
Sipas Prokurorit Albert Muçaj, Çopja dhe Lulaj u identifikuan nga pamjet filmike të disa kamerave të sigurisë së zonës ku ndodhi krimi. Eksplozivi, sipas prokurorisë, është vendosur nga Ardjel Lulaj, ndërsa Çopja e ka orientuar. Avokati mbrojtës Genci Gjokutaj kërkoi një masë më te lehtë për dy klientët e tij, por kërkesa nuk u pranua nga Gjykata.
Arjdel Lulaj, Endri Çopja dhe Serxho Teta u arrestuan të enjten nga policia në Elbasan, si autorë të shpërthimit të 13 janarit në lagjen "Rus" të Shkodrës. Lënda eksplozive ishte vendosur në një motorçikletë, që sipas hetuesve, ishte transportuar nga Elbasani në Shkodër me makinë. Eksplozivi shpërtheu teksa Lulzim Kulla, shënjestra e atentatit, po hipte në makinen e tij. Prokuroria dyshon se shkak i atentatit janë pazaret e prishura të drogës.
