'O quadro
Giovanna Balsamo
Tiene mente quanta culure tene 'a natura:
pare nu quadro pittato 'a nu grann'artista.
Ogni stagione fa na mostra 'e cose bbelle,
e tte fa mmirà paisagge c'allereano 'a vista.
'Int'a nniente te culora na stradulella:
'a regne cu ttanta fuglietelle ggialle e rrosse.
Mponta â via nce mette na vulpella,
ca zumpettea mmiez'a mmiĺle foglie smosse.
Cu cciento e cchiù pennielle variopinte,
appripara na tavolozza fatta a mmestiere:
ncoppa nce mette tanta bbelli ttinte,
pe ppittà viale, bosche, sciardine e ssentiere.
Ncielo disegna na nuvula nera e una janca,
ca salutano nu stormo d'aucielle migrante.
Nterra ce mette nu tappeto 'e foglie secche,
ca scricchiuleano sott'ê piede d' 'e passante.
'Stu brav'artista a ogni ccagno 'e stagione,
nun tene chissà quale granna ambizione:
vo' sulamente culurà frutta, fiore 'e sciure,
pe ccunzignà ll'opera d'arte mman'â natura.
Pe ffa' quadre d'autore accussì pperfette,
nce vonno tanta passione e ll'aiuto 'e Ddio.
'Stu paraviso è 'a terra...e nun se maldratta:
i' 'a porto rispetto...pecché è 'a casa mia.
Giovanna Balsamo
